Общественно-политическая интернет-газета

Аҕыйах ахсааннаах норуот араас политическэй сүүрээннэринэн хайдыспакка, федеральнай да, региональнай да таһымҥа биир политиканы, санааны тутуһан үлэлээтэхтэринэ Сахабыт сирэ силигилии сайдыаҕа сарбахтаммат.

Норуот ытыктыыр, тумус туттар дьоно республикаларын туһугар биир санаанан салайтаран үлэлээн эрэллэрэ хайҕаллаах.

Былырыын сааскыттан ыла, Ил Дархан бэйэтинэн көҕүлээн, тыа хаһаайыстыбатын сайдыытыгар аналлаах саҥа сокуон барыла киэҥ дьүүлгэ тахсыбыта. “Ааспыт сылларга агропромышленнай салааҕа үп-харчы көрдүбүт эрээри, көһүппүппүт курдук көдьүүһү аҕалбата. Онон, тыа сирин экономикатын, олоҕун-дьаһаҕын сайыннарарга саҥа сокуон наада”, - диэн кини эппитэ.

“Биирдиилээн олус таһаарыылаахтык үлэлиир кооперативтар, фермердэр, хаһаайыстыбалар баар буоллулар. Саҥалыы дьаһаллаах салайааччылар үүннүлэр. Ол гынан баран итинник ситиһиилээхтик үлэлиир хаһаайыстыбалар аҕыйахтар, баһыйар өттө кыахтарын ситэри туһаммакка, арыйбакка олороллор. Бастатан туран, ити, тыа хаһаайыстыбатын бородууксуйатын оҥорон таһаарыыга биир кэлимсэ, утумнаах систиэмэ олохтоммотоҕуттан тахсар. Сокуон сокуону кытары харгыстаһар, утарылаһар түбэлтэлэрэ бааллар, онтон үлэ тахсыыта атахтанар, быһыта-орута барар.

Мин көрүүбүнэн, «СӨ тыатын хаһаайыстыбатын сайдыытын туһунан” саҥа сокуоҥҥа АПК үлэһиттэрэ ким тугунан дьарыктанарын, кыайар кыаҕын, сыалын-соругун чопчу билиэхтээхтэр. Саҥа сокуон - эбии харчы ыһыгыннарарга буолбакка, тыа хаһаайыстыбыта сайдарыгар ананан оҥоһуллуохтаах. Биир күнүнэн кээмэйдэммэт, тыа сирин сайдыытыгар аналлаах - уонунан сыллары хабар сокуон төрөөн тахсыахтаах. Ол гынан баран, 100 бырыһыан эҥкилэ суох туох да суох. Итини өйдөөн туран, саха тыаытын сирэ сайдарыгар кыһанар, ыалдьар дьону барыларын бу саҥа сокуон барылын ырытаргытыгар, этиигитин киллэрэргитигэр ыҥырабын. Үтүөнү, туһалааҕы ылан сайыннарыаҕыҥ, саҥаны олохтооҕу киллэриэҕиҥ! Политическэй деятеллэр, муниципальнай тэриллиилэр баһылыктара, тэрилтэ салайааччылара, үлэһиттэрэ тыа сирин сайдыытыгар аналлаах “төгүрүк остуоллары”, кэпсэтиилэри таһаарыахтара диэн эрэнэбин. Көтүмэхтик сыһыаннаспакка, тыа сирэ дьиҥнээхтик сайдарын туһугар кыһаллан олохтоох этиини, саҥа санааны киллэриҥ, күүтэбит!” - диэн Егор Афанасьевич ыҥырбыта.

Улуус-улуууһанан, нэһилиэк-нэһилиэгинэн дьон түмсэн, ырытыһан аныгы кэмҥэ толору эппиэттиир кыахтаах сокуон барыла хайдах буолуохтааҕар бэйэлэрин көрүүлэрин эппиттэрэ. Элбэх, хорутуулаах өй-санаа сокуон барылыгар киирдэ диэн Егор Афанасьевич Ил Түмэн депутаттарыгар иһитиннэрэн турар.

Ити ыҥырыыны ылынан, “Сиэрдээх Россия” республикатааҕы салаатын лидерэ, Госдума депутата Федот ТУМУСОВ, тыа сирин сайдыытыгар аналлаах аһаҕас кэпсэтиигэ ыҥырар. Тыа сирин сайдыытыгар этиилээх, саҥа сокуоҥҥа көрүүлэрин этиэн баҕалаах дьону тохсунньу 27 күнүгэр, 11.00 чааска Дьокуускай куорат, Ленин пр., 22, 7 этээһигэр кэлэн “төгүрүк остуолга” ыҥырабыт! Көхтөөх буолуохха!

Источник: aartyk.ru

2016-01-26 14:23:04

Всего просмотров: 1646