В парламенте
Александр Жирков: Чурапчы аата, саха аата үйэлэр тухары ааттана, дуораһыйа турдун!
 Бэс ыйын 17 күнүгэр Ил Түмэн бэрэссэдээтэлин бастакы солбуйааччы Александр Жирков Чурапчы нэһилиэгэ төрүттэммитэ 375 сылыгар анаммыт Ыһыахха ыалдьыттаата. Ыһыахха Российскай Федерация сенатора Егор Борисов, «Арассыыйа ийэлэрэ» уопсастыбаннай хамсааһын саха сиринээҕи салаатын бэрэссэдээтэлэ Прасковья Борисова, Саха Өрөспүүбүлүкэтин бэрэссэдээтэлин бастакы солбуйааччы, өрөспүүбүлүкэтээҕи тэрийэр хамыыһыйа бэрэссэдээтэлэ Дмитрий Садовников, Ил Түмэн Мунньаҕын дьокутааттара Михаил Гуляев, Семен Никитин, Владимир Чичигинаров, Нерюнгри оройуонун баһылыга Роман Щегельняк уо.д.а. ыҥырыылаах ыалдьыттар сырыттылар.
Ил Түмэн бастакы вице-спикерэ Александр Жирков эҕэрдэ тылыгар Чурапчы улууһугар 2015 сыллаахха Олоҥхо ыһыаҕын дьоһуннук тэрийэн ыыппыттарыгар улуус оччотооҕу салалтатыгар уонна олохтоохторго барыларыгар улаханнык махтанарын туһунан эттэ.
Салгыы Александр Николаевич Ыһыахха мустубут дьоҥҥо Чурапчы улууһун үтүөкэн дьонун кытта бииргэ алтыһан, доҕордоһон үлэлээбитин уонна үлэлии сылдьарын туһунан анаан-минээн аҕынна. Олор истэригэр кини биллиилээх учуонай, профессор Георгий Прокопьевич Башарины, профессор Гаврил Георгиевич Макаровы, Саха Өрөспүүбүлүкэтин народнай художнига Афанасий Петрович Мунхаловы, норуот суруйааччыларын Василий Семенович Яковлевы–Даланы, Иван Егорович Федосеевы–Доосону, Ил Түмэн бастакы ыҥырыылаах Мунньаҕын Палататын Бэрэссэдээтэлин, бииргэ үлэлээбит доҕорун Афанасий Петрович Илларионовы, өр сылларга Хайахсыт нэһилиэгин баһылыгынан үлэлээбит Иван Иванович Филипповы, Ил Түмэҥҥэ бииргэ үлэлиир коллегаларын Павел Павлович Пинигины, Михаил Дмитриевич Гуляевы, Владимир Ильич Чичигинаровы, доҕотторун Иван Константинович Макаровы, Дмитрий Петрович Захаровы, өр кэмҥэ Чурапчы улууһун салайбыт Геннадий Михайлович Сысолятины, Иннокентий Николаевич Аммосовы, Саха Өрөспүүбүлүкэтин бастакы Ил Дарханын Егор Афанасьевич Борисовы истиҥ махтал тылларынан ааттаталаата, бииргэ үлэлээбит кэмнэрин ахтан ааста. Бу сиртэн төрүттээх чугас дьонум уонна доҕотторум күн бүгүнүгэр диэри эрэллээх аргыс, доҕор буолаллар, олохпун киэргэтэллэр, тупсараллар уонна ордук толору оҥороллор диэн этиитин улуус ыһыаҕар мустубут дьон ытыс тыаһынан көрүстүлэр.
Чурапчы дьонун-сэргэтин Үрүҥ Тунах Ыһыаҕынан бука барыларын эҕэрдэлээн, кинилэргэ үлэҕэ-үөрэххэ ситиһиилэри, өҥ, быйаҥ, дьоллоох-соргулаах олоҕу баҕаран туран түмүгэр Александр Николаевич Чурапчы улууһун Сэбиэтин депутатыгар Архипов Иннокентий Николаевичка, улуустааҕы Олоҥхо киинин салайааччытыгар Попов Дмитрий Дмитриевичка уонна анал байыаннай дьайыы кыттыылааҕар Торговкин Павел Николаевичка Ил Түмэн наҕараадаларын туттартаата.
Ил Түмэн пресс сулууспата 2023-06-22 08:43:03 Всего просмотров: 495 Поделиться: 
Ссылки по ключевым словам:
2026-04-15 19:41:40 - Из чурапчинского тира – на мировые старты: путь сестёр Готовцевых в большой спорт 2026-03-26 06:29:54 - Полномочия депутата Ил Тумэна Александра Иванова* прекращены досрочно в связи с приобретением статуса иностранного агента 2026-02-28 12:07:09 - Отчет правительства Якутии завершился в Чурапчинском улусе 2026-02-25 13:37:15 - Парламент Якутии выразил несогласие с публичными высказываниями депутата Александра Иванова
2026-02-15 08:50:50 - Уус-Майа улууhун Эдьээн нэhилиэгин баhылыга Александр Миндаев комментарийа 2026-02-12 05:26:10 - Комментарий геолога компании "Нордголд" Александра Шпекторова
2026-02-03 14:55:15 - Айсен Николаев провел рабочую встречу с главой Чурапчинского района Якутии 2026-01-24 15:34:00 - Александр Корякин наградил жителей Амгинского улуса, внёсших вклад в социально-экономическую политику РС(Я) в области строительства 2025-12-31 15:06:02 - Новогоднее поздравление от министра сельского хозяйства Якутии Артема Александров
2025-11-22 13:58:46 - Определены финалисты всероссийского турнира по вольной борьбе Александра Крылова |
