Общественно-политическая интернет-газета

Бу сыл алтынньы 10-с күнүгэр Саха Сирин норуотун дьокутаата Александр КОШУКОВ Нерюнгри оройуонун олохтоохторугар бэйдиэ сылдьар ыттартан үөскүүр алдьархайдары, кыһалҕалары таарыйар ыҥырыыта тахсыбытын кэннэ, «V Якутии.ру» интернет-хаһыат киниэхэ эбии комментарий биэрэригэр көрдөстө. Онуоха кини алтынньы 11-с күнүгэр бу сытыы кыһалҕалаах боппуруоһу маннык эбии быһааран биэрдэ:

-- Дойду Судаарыстыбыннай Дуумата бэйдиэ сылдьар ыттар кыһалҕаларын быһаарыыга регионнар бэйэлэрин олохтоох сокуоннарын уонна быһаарыыларын ылыныахтарын сөбүн көҥүлээбитин кэннэ, биһиги Ил Тумэҥҥэ 2024 сыл бэс ыйын 13-с күнүгэр бэйэбит олохтоох сокуон барылын ылыммыппыт. Бу сокуон хаһаайына суох, бэйдиэ сылдьан тутуллубут ыттары приюттартан, тутар-иитэр пууннартан биир ый устата ким да ылбатаҕына, кинилэри ыарыыта суох утутан кэбиһэри көҥүллүүр суолталаах.

Бу сокуон ис хоһоонун быһаарар буоллахха, маннык: бэйдиэ сылдьар ыт тутуллубутун кэннэ биир ый, ол эбэтэр 30 хонук устата, кинини бэйэтин хаһаайына ирдэспэтэҕинэ эбэтэр саҥа хаһаайын ыла кэлбэтэҕинэ, бу ыт ыарыыта, эрэйэ-моhуога суох, утутуллар буолуохтаах.

Бу сөптөөх сокуон. Тустаах сокуон барыла нэһилиэктэргэ бэйдиэ сылдьар ыттар ахсааннарын элбэппэт туһуттан оҥоһуллубута, билэргит курдук, сорох нэһилиэктэргэ бэйдиэ сылдьар ыттары төһө да чиптаабыттарын, бэлиэтээбиттэрин үрдүнэн, кинилэр син биир дьиикэй кыыл төрүт инстииннэрин син биир сүтэрбэттэр, адьырҕа быһыыларынан дьоҥҥо кутталы үөскэтэллэр.

Сокуон өссө биир өрүтэ - бүддьүөт харчытын харыстааһын буолар, өйдүүргүт курдук, «Бурматов сокуона» диэн ааттаммыт федеральнай сокуон барылыгар олоҕуран, олохтоох дьаһалта бэйдиэ ыттары хаһан бэйэлэрэ өлүөхтэригэр диэри иитиэхтээх, көрүөхтээх-истиэхтээх.

Миирнэй куорат кыыллар бырааптарын көмүскээччилэрэ суукка үҥсүүлэрин туһунан этэр буоллахха, маннык.

Бэйдиэ сылдьар ыттары утутар ньыманы көҥүллүүр сокуон ылыллыбыта 3 ый буолбутун кэннэ, балаҕан ыйын 17-с күнүгэр, Саха Сирин Үрдүкү суута, тустаах сокуон 2-с чааһын 5-с хос пуунун дьиҥэ суоҕунан билиммитэ. Бу пууҥҥа бэйдиэ сылдьар ыт тутуллубута 30 күн буолан баран, кинини хаһаайына ирдэспэтэҕинэ, эбэтэр саҥа хаһаайын иитэ ылбатаҕына, ыт утутуллара көҥүллэнэр диэн.

Онон биһиги, дьокутааттар, Саха Сирин Үрдүкү суутун быһаарыытын көтүттэрэр санаалаахпыт.

Биири тоһоҕолоон этиэм этэ: төһө да Миирнэй куорат кыыллар бырааптарын көмүскэһээччилэрин үҥсүүлэрин Үрдүкү суут толордор, хаһаайына суох, ый устата ким да наадыйбатах ыттары ыарыыта суох утутан кэбиһэри көҥүллүүр өрөспүүбүлүкэтээҕи сокуон бүгүҥҥү күҥҥэ диэри үлэлии турар.

Кыыллары көмүскээччилэр үҥсүүлэрэ тустаах сокуон үлэтин тохтотор кыаҕа суох. Суут быһаарыытын көтүрэр үҥсүү син биир сурулла туруоҕа, биһиги тустаах быһаарыы көтүллүөр диэри утарса туруохпут.

Онон сокуон син биир үлэлиир. Бэйдиэ сылдьар ыттар 30 хонук устата хаһаайыннарын булбатахтарына, куораттарга, бөhүөлэктэргэ, нэһилиэктэргэ төптөрү босхо ыытыллыбакка, ыарыыта суох утутуллан, "дьаhаллан" иhиэхтээхтэр.

ЭРЭДЭЭКСИЙЭТТЭН:

Бэйдиэ сылдьар, биир ый устата кинилэргэ ким да наадыйбатах ыттарга утутар ньыманы көҥүллүүр өрөспүүбүлүкэтээҕи сокуону Саха Сирин норуотун дьокутааттара Александр АТЛАСОВ, Юрий НИКОЛАЕВ, Владимир ПРОКОПЬЕВ, Андрей НАХОДКИН уонна Александр КОШУКОВ бэлэмнээн, ылылларын ситиспиттэрэ.

***

2024 сыл алтынньы 7-с күнүгэр бэйдиэ сылдьар ыттар саба түһүүлэриттэн сырдык тыына быстыбыт Чульман бөһүөлэгин олохтооҕо, 12 саастаах Виктория КАШУБАНЫ бэҕэhээ, алтынньы ый 12-с күнүгэр, тиһэх суолугар атаардылар. Быраhаайдаhыы күнэ Нерюнгри оройуонугар Кутурҕан күнүнэн биллэриллибитэ.

2024-10-13 09:50:14

Всего просмотров: 102