Сахалыы сыhыарыы
Путин Саха сириттэн арахпат
Улахан тойон кэлэринэн сибээстээн, балаҕан ыйын 24 күнүгэр халлааны барытын «хатаан» эрэллэр. Үрдүнэн үргүөр үрбэтин диэн, алларанан аргыар аргыйбатын диэн. Үйэтин үгүс өттүн кистэлэҥ сулууспаҕа үлэлээбит киһи диэх курдук. Кэтэнэрэ-мананара чыҥха кытаанах, сэрэнэрэ-сэрбэнэрэ адьас ураты. Премьер сөмөлүөтэ халлааны хайыта суруйар кэмигэр, кини суолун туһаайыытынан, чыычаах да көтүө суохтаах. Эгэ, аалы аһардыахтара дуо!
Путин кэлиэн биир хонук иннинэ, Саха сиригэр Патриарх Кирилл кэлиэхтээх. Онон, өрөспүүбүлүкэ былаастарыгар икки аҥыы хайдар кыһалҕа тириир. иккиэннэригэр тииһинэ, ыалдьытымсахтарын көрдөрө охсуохтаахтар. Путин уонна Патриарх сылдьар улуустарын баһылыктарыгар эмиэ биир улахан ирдэбил сүктэриллэр. Сиргэ-буорга түспэт курдук дьаһаныахтаахтар. Путин Тиксиигэ кэлэн барар түрүлүөнүн түмүгэр Тиксии бөһүөлэгин баһылыга миэстэтиттэн букатыннаахтык маппыт сурахтаах.
Премьер, ытык Дыгын Дархан төрөөбүт сиригэр-уотугар Хаҥалас улууһугар тимир суол тиҥкинээн кэлэн иһэр үөрүүлээх тэрээһинигэр кыттыһыахтаах. Кэрдэмҥэ диэри, бука, бөртөлүөтүнэн бырахтарар буолуохтаах. Оннооҕор Тиксииттэн 10-ча мүнүүтэлээх сиргэ сиринэн айаннаабакка, бөртөлүөттэммитэ биллэр.
Бу сырыыга Путин боростуой норуоту кытары илэ кэпсэтэ түһэрэ дуу? Эмиэ уот ылардыы төттөрү ыстаннарара дуу. Тиксиигэ суруналыыстартан СИА фотограбын кытары телеоператоры эрэ чугаһаппыттара. Оттон Тиксии кэнниттэн Дальнай Восток регионнарыгар сылдьарыгар, дьону-сэргэни кытары налыйан кэпсэтэрэ-ипсэтэрэ, суруналыыстарга киһилии интервью биэрэрин көрбүппүт ээ. Баҕар, быыбардааччыта аҕыйах диэн, биһиги сирбитигэр улаханнык өрөөн тохтообото буолуо…
(Кыым.ру - 20.09.10) 2010-09-21 08:47:10 Всего просмотров: 2168 Поделиться: 
Ссылки по ключевым словам:
2013-03-01 11:51:36 - Идрис ТАНГИЕВ: "Казаряны Саха сириттэн көһөрүөххэ!" 2010-09-21 08:47:10 - Путин Саха сириттэн арахпат |
