Сахалыы сыhыарыы
Хомуньуустар “сордоох сухалара”
 Хомуньуустар “сордоох сухалара” Бииктэр ГУБАРЕВ хоруппат буолбута ыраатта да, тоҕо эрэ бэлиитикэ буолатыттан барыан кэриэтин кэриэс. Эдэр, орто саастаах хомуньуус эрэттэрэ бааллар даҕаны, үс миэстэҕэ тэҥинэн лаҕыйан олорор оҕонньордорун туура тутан ылан эһэн кэбиһиэхтэрин оннугар, тоҥхоруҥнуу-тоҥхоруҥнуу тула холоруктуу сылдьаллар.
Былыр-былыргыттан “араартаа уонна дьаһайтаа” диэн баһылыктар улаҕалаах, мындыр быраабылалаахтар. Чаҕардар иллээх-эйэлээх буоллахтарына, биир үтүө күн сүбэлэһэн баран былаастаахтарын өрө сүргэйэн туруохтарын сөп. Ол иһин баһылык кулуттарын бэйэ-бэйэлэрин кытары киксиһиннэртээн, иирсиһиннэртээн, кими эрэ манньалаан, кими эрэ күтүрээн – араартаталаан, кэбэҕэстик дьаһайарга усулуобуйа олохтуур.
Дьүһүн кубулуймтуо Бииктэр ГУБАРЕВ хаһан эрэ бэйэтэ суруналыыстаан килиэп таһаарына сылдьыбыт кэмнээх. “Северная трасса” диэн хаһыакка, 90-с сылларга, Сталин мөкү уобараһын саралаан, Сэбиэскэй кэми элэктээн, “прихватизацияны” ыытар Чубайсы уу иһэ-иһэ айхаллаан ыстатыйа бөҕө суруйан тирилэппит киһи. Ол бэйэтэ билигин кэлэн, түҥнэри түһэн, хомуньуус кылааннааҕа, муостааҕа-туйахтааҕа, өргөстөөҕө буолан өрө өкчөрүҥнээн, алмаасчыттар тиэргэннэригэр Сталин бюһун уйадыйан туран астара сылдьар.
Сааһырбыт оҕонньор киһи собус-соҕотоҕун (?) Дьокуускай куоракка тугу гына сылдьара буолла... ойоҕо, оҕото былыр үйэҕэ киин сиргэ көспүттэрэ быданнаата эбээт. Харчы? Ленин проспегар турар кыһыл кирпииччэттэн тутуллубут киэҥ-куоҥ Хомуньуустар дьиэлэрин куортамын дьаһайаары, “баартыйа сыалыгар” көмүстээх үрүйэлэри үлэлэтээри, КПРФ Госдума партия буоларын быһыытынан, быыбар куолаһыгар өлөрөр харчытын хонтуруоллаары барбакка сылдьар дииллэрэ оруннаах? Баҕар, сахалар барахсаттары, Саха сирин туругурдаары тиритэ-хорута үлэлиирэ дуу?
Боростуой хомуньуустар “Интеграция” ХЭТ тугунан дьарыктанарын аһара билиэхпитин баҕарабыт диэн этэ-тыына сатыыллар даҕаны оҕонньордоро быһаарбат. Баартыйа харчыта ханна барарый, кимҥэ иҥэрий?
Хомуньуустар Саха сиринээҕи баһылыктара “Аартык.ру” хаһыаты хара тэриллиэҕиттэн онно-манна сыһа-соһо сылдьан үҥсэ сатаан тилэҕин элэтээхтиир. Роскомсвязьнадзортан саҕалаан, ИДьМ, атын да быраабы араҥаччылыыр, хонтуруоллуур араас структураларга тиийэ бэйэтинэн “донуос” бөҕө таһан кыһаллан ахан түбүгүрэр.
“Таһыттан көрдөххө, ньылбааран наһаа быраабылнай баҕайы курдук. Онтон хасыһан үөрэтэн көрдөххө иһэ-истээх кырдьаҕас эбит”, - диэн биир силиэдэбэтэл бэсиэдэҕэ ыҥыран олорон төбөтүн быһа илгистибиттээх. Улугурууга да, Уларыта тутууга да, хомуньууһумҥа да, хаппыталыыһымҥа да – барытыгар бас бэринэр, сөп түбэһэр дьон үйэтэ уһун.
Госдума быыбара бу ыган кэлбитигэр, хомуньуус ГУБАРЕВ пиарданара туга да суох –республика норуотун туһугар күттүөннээҕи, көдьүүстээҕи туппута-хаппыта суох. Ол иһин сатахха, диэбиккэ дылы, саатар суруналыыстары кытары сууттаһан ааппын ханна эмэ кыбыппыт киһи дии санаатаҕа буолуо, “Аартык.ру” уочараттаах ыстатыйатын суукка үҥсэн сүпсүгүрдэ.
Хомуньуустар депутаттара Ирина ЕНТОРОВА уолаттара уонна көмөлөһөөччүтэ Уус Майаҕа улахан буруйу оҥорбуттарын туһунан “Аартык.ру” ааптара суруйбутугар – “бу интернет-сайт КПРФ үрдүк аатын киртиттэ, сиргэ-буорга тэбистэ, уодьуганнаан” диэн. Бастатан туран, барҕа махтал – Саха сирин биир сахалыы сайтын сыыһа бүтүн Арассыыйа баартыйатын аатын-суолун “киртитэр” модун кыахтаах дии саныыргар. Улуутуйан тутум үрдээн утуйар уу умнулунна, эр-ойох быраҕылынна.
“КПРФ –криминальная партия РФ” диэн аббревиатураны тэниччи тардан бүтүн хаһыат таһаараллар, киинэ усталлар. “Аартык.ру” ааптара төбөтүттэн ылан толкуйдаабатах тыла-өһө. ГУБАРЕВ өһүргэнэн өттүгүн туура түспүт.
Хомуньуус ЕНТОРОВА уолаттара уонна көмөлөһөөччүтэ көмүһү күрэппиттэрин, ол туһуттан киһини дьууктаабыттарын туһунан сонуну, бэл, уорганнар официальнай сайтара кытары биллэрэн турар. “Аартык.ру” өйтөн айбыт детективэ буолбатах. Суруйбуттарын суруйумуна, эппиттэрин тиэрдиминэ. Өһүргэтиилээх буоллаҕына үтүө, кэрэ, кэскиллээх дьыалата оҥоруҥ эбээт, табаарыстар.
Аны, биир ыстатыйа аатыттан өһүргэнэн - “Старик Губарев переизбран 1 секретарем рескома КПРФ” – ГУБАРЕВ ИДьМ Экстремизми утары охсуһар кииҥҥэ үҥсэн турбуттаах. 70-чалаах киһини, наһаа да баҕарбытыҥ иһин, хайдах “уол Губарев” диир кыаллыбата чахчы. “Оҕонньор” диэн тыл ыыс-кырыыс буолбатах.
Быһатын, “уол” “Аартык.ру” утары уочараттаах үҥсүүтэ, Дьокуускай куорат суутун олунньу 18 күнүнээҕи быһаарыытынан – эмиэ олоҕо суох диэн буолла.
Эдэр-сэнэх хомуньуустар, “уолгут” саатар биир кириэһилэтин туура тутан ылыах да эбиккит. Хайа муҥун “уол” мыччыстыбыт сөмүйэтин үрдүгэр эргитиллэ сылдьыаххытый. Кэччэгэй баай кэриэһэ суох. Мандатын да, дуоһунаһын да туран биэрэрэ сир саарбах, эрэннэрдэҕин аайы кытара-кытара бэйэ-бэйэҕитин кымаахтаһан бүтүҥ.
http://aartyk.ru/obshestvo/item/7142-homunuustar-%E2%80%9Csordooh-suhalara%E2%80%9D
СМ.ПО ТЕМЕ:
КПРФ – КРИМИНАЛЬНАЯ партия РФ?
2016-02-19 06:59:33 Всего просмотров: 1108 Поделиться: 
Ссылки по ключевым словам:
2016-02-19 06:59:33 - Хомуньуустар “сордоох сухалара” |
