Общественно-политическая интернет-газета

Биһиги, Таатта улууһун быыбардыыр бырааптаах дьоно-сэргэтэ бу дьыл ахсынньы 12 күнүгэр, судаарыстыбабыт төрүт Сокуонун ылыммыт бэлиэ күммүтүгэр Дьокуускай куорат суута Саха сирин Государственнай Мунньаҕын-Ил Түмэн депутата Афанасий Николаевич Максимовы судаарыстыба үбүн матайдааһыҥҥа буруйдааҕынан ааҕан олус ыарахан, көҥүлүн хааччахтыыр уурааҕы таһаарбытыттан бэрт улаханнык айманныбыт, долгуйдубут.

Афанасий Николаевич биһиги депутаппыт, республика улахан салайааччыта буолан туран дириҥник хорутан үлэлээбит үлэтин, оҥорбут элбэх үтүөтүн-өҥөтун биһиги быыбардааччылара буолан туран бэрт үчүгэйдик сиһилии билэбит, истэбит. Кини республика Государственнай Мунньаҕын Ил Түмэнигэр үс төгүллээн Томпо, Таатта уонна Чурапчы улуустарын быыбардааччылара биир санаанан талбыттара. Бэйэтэ оҕо эрдэҕиттэн тыа олоҕун-дьаһаҕын дьиҥ этинэн-хаанынан билбит буолан, тыа сирин олохтоохторун олоҕо–дьаһаҕа тупсарын туһугар үгүс өрүттээх үлэни ыыппыта. Бүтүн Россия үрдүнэн ырыынакка киирии дьалхааннаах кэмигэр республикаҕа дьоҕус бизнес эйгэтигэр үлэлэһэн саха ыччаттарыттан биир бастакынан бөҕө акылааты уурсубута. Оччотооҕу кэмнэргэ Америка, Соҕуруу Корея, Гонгконг уонна Канада курдук сайдыылаах тас дойдулары кытары ыкса сибээһи олохтообута.

Афанасий Николаевич бэйэтин талан ылбыт идэтинэн ситиһиилээхтик үлэлээн республика авиацията сайдарыгар улахан кылаатын киллэрсибитэ. Салгыы «Илин» авиакомпанияны тэрийэн 140 үлэ миэстэтин таһаарбыта, республика норуотун хаһаайыстыбатын бары салааларыгар таһаҕас тиэйиитин, пассажирдары көтүтүү, санитарнай авиация үлэлэрин үс гыммыттан биирин толорбута. Ол туоһутунан киниэхэ Саха республикатын авиациятин бочуоттаах үлэһитин аата иҥэриллибитэ. Итини сэргэ тыа сирин дьоно ылсыһа илик дьарыктарын саҕалаан, «Якол» диэн ааттааах уматыгы хааччыйар компанияны тэрийэн үлэлэппитэ. Бу компания иһинэн 600-кэ эдэр ыччакка үлэ миэстэтин таһааран тыа сирин бэрт элбэх ыччатын үлэнэн-хамнаһынан хааччыйбыта. Салгыы «Илин- тур» туристическай компанияны, «Яколстройсервис» тутуунан дьарыктанар компанияны уонна «Якол» харабыллыыр агенствоны тэрийэн үгүс саҥа үлэ миэстэлэрин таһаарбыта.

Афанасий Николаевич республикаҕа үөрэхтээһин сайдыытыгар улахан кылаатын киллэрсибитэ, ыччаты үөрэттэриигэ, талааннаах оҕолору өйөөһүҥҥэ уонна үгүс оскуолалар тутууларыгар элбэх сыратын биэрэн үлэлэспитэ. Ол туоһутунан «Үөрэҕирии меценатын» бочуоттаах аата иҥэриллибитэ. Республика хас да орто оскуолатын попечителинэн талыллан үлэлээбитэ. Бу үлэтин сыаналанан СР Президенэ үрүҥ көмүс мэтээлинэн бэлиэтэммитэ. 2007 сыллаахха Россия экономическай уонна социальнай барҕарыытыгар киллэрбит үтүөлэрин иһин «Аҕа дойду сулуһа» орденынан наҕараадаламмыта.

Биһиги депутаппыт Афанасий Николаевич киһи быһыытынан бэрт аһыныгас уйаҕас дууһалаах киһи. Кини араас кыьалҕаҕа түбэспит дьонно, дьиэ кэргэҥҥэ куруутун өйөбүл буола сылдьар үтүө үгэстээх. Ол курдук Таатта улууһа улахан ууга барбыт алдьархайдаах кэмнэрбитигэр уонна уотунан уһуурбут тыа баһаарын ынырыктаах күннэригэр түүнү-күнүһү аахсыбакка туран олохтоох нэһилиэнньэҕэ, тэрилтэлэргэ үгүс өрүттээх үлэни-хамнаһы тиһигин быспакка ыытан көмөлөспүтэ дьонун-сэргэтин сүрэҕэр иҥэн сылдьар.

Депутаппыт А.Н. Максимов улууска спорду уонна чөл олоҕу сайыннарыыга өйөбүлэ, көмөтө улаханын астынабыт. Ол курдук, кини улууска көҥүл тустуу республикатааҕы турнирын түөрт төгүл спонсордаан ыыппыта. Билиҥҥи кэмҥэ эдэр ыччаппыт түмсэр спортивнай саалаларын тутан үлэҕэ киллэриигэ уонна кинилэр матырыйаалынай базалара хааҥыырыгар улахан көмөнү оҥорбута. Улуус спортсменнара кинини көҥүл тустуу федерациятын председателинэн талан үлэлэтэллэр. Төрөөбүт улууһун туһугар ыытар элбэх ахсааннаах үлэтэ сыаналанан кини Таатта улууһун бочуоттаах олохтооҕо, Алдан уонна Даайа–Амматын нэһилиэктэрин бочуоттаах олохтооҕо ааттара иҥэриллибиттэрэ да туоһулуур.

Афанасий Николаевич бу ырыынак сыһыаннаһыыларын уустук кэмигэр тус бэйэтин дьоҕурунан эрэ үүнэн, иитиллэн тахсыбыт тарбахха баттанар биир бастыҥ талааннаах, кэскиллээх тумус туттар киһибит. Саха омук дьиҥнээх патриота, киэҥ далааһыннаах, ураты көрүүлээх, бэйэтэ туспа суоллаах-иистээх политик салайааччы. Кини республика промышленноһын нефть-гаас курдук уустук эйгэтигэр тыа сириттэн тахсыбыт ыччаттарыттан салайааччы быһыытынан бастакынан суолу солообута.

Биһиги боростуой, үлэлээн ииттинэр норуот үөһээҥи былаас таһымыгар улахан политика тула туох ханнык мөҕүөннээх мөккүөрдэр тахсалларын чуолкай билбэппит эрээри, сурэхпит таайар буоллаҕа. Холобура, «Саханефтегаз» хампаанньа тула туох иһин бэрт мөккүөрдээх киирсиилэр барбыттарын сэрэйэбит. Афанасий Николаевич тус бэйэтэ улахан патриот киһи уонна бэйэтин төрөөбүт дойдута үүнүөн-сайдыан, дьоно-сэргэтэ байылыат олохтонуон баҕалаах киһи, салайааччы буолан туран республикабыт бөдөҥ тэрилтэлэрэ атыыланалларын утарсыбыта.

Бу күннэргэ Дьокуускай куорат суута А.Н. Максимов дьыалатын көрөрүн кытары Россия киин телевидениета тута кэриэтэ наһаа суһаллык көрдөрөн уонна хас да төгүл хатылаан эфиргэ таһаарбыттара республикабыт депутатын киһи уонна личность быһыытынан олус улаханнык түһэрбиттэрэ биһиэхэ араас санаалары үөскэтэн улаханнык долгутта, уйулҕабытын хамсатта.

Итинник этэн туран биһиги Таатта улууһун олохтоохторо республикабыт быыбардааччыларыгар, үөһэҥҥи салалтатыгар уонна үрдүкү суутугар бэчээт нөҥүө аһаҕастык Дьокуускай куорат суута бу дьыл ахсынньы 12 күнүгэр Ил Тумэн депутата А.Н. Максимовка таһаарбыт уурааҕын кытта сөпсөспөппүтүн биллэрэбит.

Бу аһаҕас сурукка улуус 1861 быыбардааччыта илии баттаатылар.

Салгыы быыбардааччылар илии баттааһыннара киирэ турар.

(Газета "Кыым" - 22.12.11).

2011-12-26 11:47:19

Всего просмотров: 2821