В парламенте
Ил Түмэн дьокутааттара Нам улууһун дэлэгээссийэтин көрүстүлэр
 Ил Түмэн дьокутааттара Нам улууһун дэлэгээссийэтин көрүстүлэр. Көрсүһүү муус устар 7 күнүгэр Дьокуускай куоракка Нам улууһун күннэрин чэрчитинэн ыытылынна. Тэрээһини Ил Түмэн Бэрэссэдээтэлэ Алексей Еремеев иилээн-саҕалаан ыытта.
Ил Түмэн олохтоох бэйэни салайыныыга сис кэмитиэтин бэрэссэдээтэлэ Владимир Прокопьев «Публичнай былаас ньыгыл тиһигэр олохтоох салайыныыны тэрийии уопсай бириинсиптэрин туһунан» федеральнай сокуон ымпыгын-чымпыгын билиһиннэрдэ уонна ыалдьыттар боппуруостарыгар хоруйдаата.
Кэмитиэт бэрэссэдээтэлэ сүрүн болҕомтотун боломуочуйа боппуруоһугар уурда. «Сокуон быйыл бэс ыйын 19-гар күүһүгэр киирэр. Оттон 2027 сыл тохсунньу 1 күнүттэн букатыннык киириэхтээх. Ол иһин өрөспүүбүлүкэ сокуонун быйылгы сыл бүтүөр диэри бүтэриэхтээхпит», – диэтэ Владимир Прокопьев.
Алексей Еремеев өрөспүүбүлүкэ былааһа икки таһымнаах тиһик хааларыгар көрүүлээх диэн эттэ. «Ил Дархан Айсен Николаевы кытта кэпсэтэн баран икки мэндиэмэннээх олохтоох бэйэни салайыныы өрөспүүбүлүкэҕэ хаалыан наада диэн түмүккэ кэлэн олоробут. Онон бу сокуоммутун ылынан кэлэр дьылга биһиги саҥа сокуоннаах киириэхттээхпит», – диэн эттэ Ил Түмэн испиикэрэ.
Улуус бас-көс дьоно ситэриилээх былаас бэрэстэбиитэллэригэр бэйэлэрин кыһалҕаларын кэпсээтилэр уонна сытыытык турар ыйытыылары биэрдилэр. СӨ тыа хаһаайыстыбатын уонна продовольственнай бэлиитикэ миниистирэ Артем Александров, СӨ үп миниистирин эбээһинэһин толорооччута Иван Алексеев, СӨ оборона дьыалаларыгар уонна нэһилиэнньэ олоҕо куттала суох буолуутун хааччыйыыга миниистирин бастакы солбуйааччыта Айаал Вензель баһылыктар ыйытыыларыгар эппиэттэри биэрдилэр.
Кэпсэтиигэ хаарбах туруктаах дьиэттэн көһөрүү бырагырааманан дьиэлэри тутууну үбүлээһин, муниципальнай сулууспалаахтар биэнсийэлэрэ, инбэлиит оҕолоох ыаллары дьиэнэн хааччыйыы, үүтү туттарыы сыаната уо.д.а. боппуруостар таарылыннылар.
Нам улууһун баһылыга Юрий Слепцов Алексей Еремеевкэ былырыыҥҥы халаан содулун туоратарга көмөтүн иһин махтанна. 2024 сыллааҕы ыарахан түбэлтэ улууска быйыл хатыламматыгар билиҥҥиттэн күүстээх үлэ ыытылларын эттэ.
Түмүккэ Ил Түмэн Бэрэссэдээтэлэ Алексей Еремеев халаан уутугар бэлэмнэнэн, үчүгэйдик оттоон, кыстык үлэтигэр бэлэмнэнэн эһиилги дьылга олох хаамыытынан кэлэн иһэргэ ыҥырда. Ону кытта Нам улууһун сытыытык турар кыһалҕалаах боппуруостарын быһаарарга миниистирдэргэ дьаһал биэрдэ.
Ил Түмэн пресс-сулууспата
2025-04-08 02:08:41 Всего просмотров: 203 Поделиться: 
Ссылки по ключевым словам:
2025-10-21 06:54:09 - Ил Түмэн бэрэссэдээтэлэ Алексей Еремеев «Талбан» биэриигэ Төрүт Сокуоҥҥа киирэр уларытыылары быһаарда 2025-09-12 06:15:13 - Дьокутааттар сарсыҥҥыны торумнаатылар 2025-06-17 00:12:45 - Ил Түмэн хатыыһы, муксууну сокуоннайа суох балыктааһын иһин ыстараабы намтатарга этии киллэрдэ 2025-04-08 02:08:41 - Ил Түмэн дьокутааттара Нам улууһун дэлэгээссийэтин көрүстүлэр 2024-08-18 00:25:05 - В Нюрбе состоялось официальное открытие II Республиканского молодежного фестиваля «Түмэр түгэн» 2023-01-21 14:02:47 - Алексей Еремеев Нам улууһун 2022 сыллааҕы түмүгүн таһаарыытыгар кытынна 2022-11-22 06:20:18 - Аҕыйах үөрэнээччилээх оскуолалар дьылҕаларын Ил Түмэн бэйэтин көрүүтүгэр ылла 2022-02-12 16:26:50 - «Бу Дьокуускай» биэриигэ: Саха сирин ойуурун түмэлигэр (11.02.22) 2019-01-12 06:11:28 - «У НАС ПОЯВИЛАСЬ ПОЛИЦИЯ НРАВОВ?». Рейды общественников «Үс түмсүү» по клубам вызвали неоднозначную реакцию 2018-05-05 00:34:51 - Ил Түмэн бэрэссэдээтэлэ Александр ЖИРКОВ ааспыт быһылааҥҥа сыһыанын эттэ |
