Общественно-политическая интернет-газета

Мантан ыла ханнык оскуола аҕыйах үөрэнээччилээх оскуола ахсааныгар киириэхтээҕин Ил Түмэн бэйэтэ быһаарар буолуоҕа. Итинник сокуон барылын Ил Түмэн бастакы вице-спикерэ Александр Жирков оҥорон Өрөспүүбүлүкэ парламенын көрүүтүгэр киллэрбитэ.

Урут иһитиннэриллибитин курдук, быйыл саас СӨ Бырабыыталыстыбата аҕыйах үөрэнээччилээх оскуола ахсааныгар киллэрии критерийин Бырабыыталыстыба бэйэтэ быһаарар, уонна онуоха сөп түбэһиннэрэн ол оскуолаларга көмө оҥоһулларын-оҥоһуллубатын СӨ үөрэҕин министиэристибэтэ быһаарар диэн ис хоһоонноох “Саха Өрөспүүбүлүкэтигэр үөрэх туһунан” сокуонугар уларытыы киллэрэр туһунан этиини Ил Түмэн көрүүтүгэр киллэрэ сылдьыбыта.

Ол этиини Ил Түмэн бастакы вице-спикерэ Александр Жирков уонна спикер Алексей Еремеев этиилэринэн дьокутааттар өйөөбөтөхтөрө, Бырабыыталыстыбаҕа төнүннэрбиттэрэ.

Бырабыыталыстыба сокуонун барылын утаран тыл этэригэр Александр Жирков “Бырабыыталыстыба этиитин ылыннахпытына Өрөспүүбүлүкэҕэ аҕыйах үөрэнээччилээх оскуолалар көмүскэнэр кыахтара лаппа мөлтүөҕэ», – диэбитэ. Александр Николаевич этэринэн, Бырабыыталыстыба сыллааҕы үп-харчы туругуттан көрөн критерийдэри хайдах баҕарар уларытыан сөп, Үөрэх министиэристибэтэ эмиэ үп кырыымчыгар ыктаран бу оскуолалар ахсааннара аҕыйыырын утарыа суоҕа. “Итинник буолбатын туһугар тыа сиригэр баар аҕыйах үөрэнээччилээх оскуолалар критерийдэрэ сокуонунан бигэргэтиллиэхтээх, уонна ону Ил Түмэн бэйэтигэр ылыныахтаах. Кыра оскуолалары харыстааһын тыа сиригэр дьону олохсута сатааһын биир сүрүн көрүҥэ. Кыра оскуолаларга өйөбүл мөлтөөтөҕүнэ дьон олоҕо ордук уустугуруоҕа», – диэн Ил Түмэн бастакы вице-спикерэ Бырабыыталыстыба киллэрбит сокуонун тохтоторго эппитэ уонна быйылгы дьылы аһарбакка аҕыйах үөрэнээччилээх оскуолалары харыстыырга туһуламмыт сокуон барылын Ил Түмэн бэйэтэ оҥоруоҕа диэбитэ.

Ол этиитин толорон, ханнык оскуоланы аҕыйах үөрэнээччилээх оскуола ахсааныгар киллэрэр критерийдэри Ил Түмэн бэйэтэ оҥорор гына сокуон бырайыагын бэлэмнээн быйыл күһүн парламент көрүүтүгэр киллэрбитэ уонна коллегаларын, Ил Түмэн дьокутааттарын, өйүүллэригэр ыҥырбыта.

Александр Жирков киллэрбит этиитэ бу дьыл сэтинньи 16 к. ыытыллыбыт Ил Түмэн пленарнай мунньаҕар биир да утарыыта суох өйөннө. Бастакы вице-спикер киллэрбит сокуонун барылын коллегара А.Н. Атласова, С.М. Афанасьев, Ф.В. Габышева, А.А. Григорьева, И.И. Григорьев, В.Н. Губарев, М.Д. Гуляев, А.Н. Дорогань, А.М. Находкин, Ю.М. Николаев, П.П. Петров, В.М. Прокопьев, И.И. Слепцов, Р.Е. Федотов, В.И. Чичигинаров өйөөтүлэр.

Мантан ыла аҕыйах үөрэнээччилээх оскуолалар дьылҕаларын саҥа сокуон араҥаччылыаҕа. Үп-харчы баарыттан-суоҕуттан, эбэтэр атын төрүөттэринэн критерийдэри үөһээ-аллараа тутуу, оскуолалар испииһэктэрин уларытыы суох буолуоҕа.

Ылыныллыбыт сокуон суолтатын туһунан этэригэр Александр Жирков: «Дойдуга үөрэх тиһигэ билигин да оннун була илик. Госдумаҕа үөрэх эйгэтин уларытыыга саҥаттан саҥа сокуоннар барыллара киирэ тураллар. Сотору кэминэн муниципальнай үөрэх тэрилтэлэрин тутула эмиэ уларытыллар буолла. Маннык кэмҥэ биһиги туох ханнык иннинэ тыа оскуолаларын, олохтоох дьон олорор кыра түөлбэлэрин сокуонунан араҥаччылыы сатыахтаахпыт. Инникитин аҕыйах үөрэнээччилээх оскуолаларга, оҕо садтарыгар (уһуйааннарга), ол иһигэр көс оскуолаларга, судаарыстыба өттүттэн көрүллүөхтээх көмөнү эмиэ быстах дьаһалларынан буолбакка сокуонунан мэктиэлиир ордук буолуоҕа”,– диэн эттэ.

https://www.iltumen.ru/news/22975

2022-11-22 06:20:18

Всего просмотров: 299