Общественно-политическая интернет-газета

Сэтинньи ый 29 күнүгэр Мэҥэ-Хаҥалас улууһун Майа сэлиэнньэтигэр Дмитрий Федорович Ходулов аатынан култуура киинигэр күнүс икки чаастан спорду, физкультураны өрө туппут спортсменнар, физкультура учууталларын өрөгөй күннэрэ буолан ааста.

Бу тэрээһин чэрчитинэн Дьол түһүлгэтэ кииҥҥэ «Учителя физической культуры Мегино-Кангаласского улуса” - диэн саҥа бэчээттэнэн тахсыбыт кинигэ сүрэхтэниитэ буолла. Кинигэ ааптардара - Анна Ивановна уонна Михаил Андреевич Петровтар.

Анна Петрова: “Кинигэ бэлэмнээһинигэр улуус 35 оскуолаларыттан дириэктэрдэр, завучтар, методистар кыттыыны ыллылар. Икки сылтан ордук үлэлээтибит. Нэһилиэктэр оскуолаларыттан барыта холбоон 500-тэн тахса киһилээх испииһэк кэлбитэ. Онтон 290 -ча киһи киирдэ. Аҕа дойдуну көмүскүүр улуу сэрии кэмигэр үлэлээбиттэртэн 9 киһи киирдэ. Спортзаллары тутууга болуотунньугунан үлэлээбиттэртэн кытары киллэрдибит. Кинигэ 9 балаһалаах, 1 приложениелаах. Физкультура учууталлара нэһилиэккэ саамай тутаах үлэһиттэр. Кинилэр уруок эрэ биэрэр буолбатахтар. Нэһилиэк общественнай олоҕор быһаччы, актыыбынайдык кытталлар. Хайдах баҕарар таһымнаах күрэхтэһиини барытын, эрчиллиититтэн саҕалаан, күрэхтэһиитин тэрийиитигэр тиийэ, өрөбүл, уоппуска диэбэккэ сүүрэллэрэ”.

Кинигэ, физкультура учууталларын үлэлэрин, спорт сайдыытын туһунан аһаҕас кэпсэтии түгэннэриттэн:

Василий Филиппов: “Физкультура учууталлара нэһилиэккэ түргэн-тарҕан туттуулаах, күүстээх, дьулуурдаах буолан, эдэр ыччакка өрүү холобур буолаллара. “

Афанасий Илларионов: “ Физкультура учууталлара хас биирдии оҕону кытта болҕомтолоохтук, дьаныардаахтык үлэлииллэрэ, кини спорт ханнык көрүҥэр ордук дьоҕурдааҕын быһааран, күүскэ дьарыктыыллара. Оҕо барыта бөҕө туруктаах, кыахтаах буоларыгар болҕомтолорун уураллара. Аны оҕо спордун сайыннарар туһунан кинигэ тахсара буоллар.“

Дмитрий Сыромятников: “Ардыгар олоххо физкультура учууталларын үлэтин намтата сыаналааһын көстөөччү. Дьиҥ иһинэн, үчүгэй физкультура учууталлаах нэһилиэк олох бары көрүҥнэригэр саамай сайдыылаах нэһилиэк буолааччы“.

Виталий Пестряков: “ Оҕоҕо патриотизм өйдөбүлүн толору биэрэр учуутал – физкультура учуутала. Кини оҕо эт-хаан өттүнэн бөҕө, күүстээх буоллаҕына эрэ, билиини ылынымтыа, үрдүк билиигэ дьулуһумтуо буолар диир. Уонна эт хаан да, өй санаа да өттүнэн сайдыылаах оҕо ийэ дойдуну көмүскүүргэ, сайыннарарга, биллэн турар, ордук бэлэмнээх диэн, оннук оҕону иитэн таһаарарга дьулуһар”.

Андрей Захаров: “Спордунан, физкультуранан дьарыгы маассабай оҥордоххо эрэ спорт уонна физкультура күүскэ сайдан, общество сайдыытыгар үтүөнэн дьайыыта улаатыан сөп. Онно спорт көрүҥнэриттэн чуолаан волейбол, футбол, хайыһар сайдаллара ордук туһаны аҕалыа этэ».

Гаврил Попов: “Улууспутугар «Парус” спорткомплекс аһыллан үлэлээбитэ - бу олус бэрт“.

Бэртээхэй ис хоһоонноох кинигэни таһаарбыттарынан мустубут дьон бары ааптардары истиҥник, үөрэ – көтө эҕэрдэлээтилэр, махтаннылар.

Улуус аҕа баһылыга Дмитрий Тихонов мустубут спорт ветераннарын, үлэлии сылдьар учууталлары, тренердэри, ыҥырыылаах ыалдьыттары эҕэрдэлээтэ. Бу үтүөкэн тэрээһиҥҥэ анаан, саҥа бэчээттэнэн тахсыбыт кинигэлэр, Родион Юрьевич Кривогорницын таҥан оҥорбут Мэҥэ-Хаҥалас улууһугар спорт сайдыытын сиһилии кэпсиир документальнай киинэтэ, хаһыаттарга суруллубут ыстатыйалар - бары спортивнай хамсааһыны бэркэ сырдаталларын, спорт киһи доруобуйата тупсарыгар, нэһилиэк олоҕун сайдыытыгар сүҥкэн дьайыылааҕын бэлиэтээтэ. Биллэр-көстөр спортсменнар, үчүгэй көрдөрүүлээх тренердэр, күнүн ахсын сыралаһан кэскиллэрбит – оҕолорбут доруобай, күүстээх, кыахтаах буола улааталларыгар үлэлэһэ сылдьар физкультура учууталларын биир-биир тус ааттаталаан эҕэрдэлээтэ. Манчаары Баһылай сиэннэрэ – Мэҥэ Хаҥалас спортсменнара өссө үрдүк кирбиилэри ылалларыгар, кыайыылары аҕалалларыгар, Олимпийскай чемпионнары иитэн таһааралларыгар, спорт улууска өссө күүскэ, элбэх киһини хабан сайдарыгар баҕатын эттэ.

Өрөспүүбүлүкэ спортка уонна физкультураҕа миниистирин солбуйааччы Александр Бугаев: “Мэҥэ Хаҥалас спортсменнара спорт бары көрүҥнэригэр дойду таһымыгар киэҥник биллэллэр. Манчаары оонньуулара 21 төгүллээн ыытыллыбыттарыттан 11-гэр Кыайыыны Мэҥэлэр ылбыттарын санатта. Спорду уонна физическай култуураны өрө тутар улуус инники сайдыыта сырдык уонна күүстээх буолуоҕар эрэлин эттэ.

Салгыы Мэҥэ Хаҥаластан төрүттээх эстрада ырыаһыттара ырыаларын, «Кыталык” үҥкүү ансаамбыла үҥкүүлэрин бэлэхтээтилэр.

СӨ спортка уонна физическэй култуураҕа миниистирин солбуйааччыта Александр Бугаев уонна улуус аҕа баһылыга Дмитрий Тихонов ситиһиилээх, биллиилээх спорт ветераннарыгар, тренердэригэр, физкультура учууталларыгар юбилейнай знактары, махтал суруктары, сибэкки букеттарын туттартаатылар.

Хаптаҕайтан Егорова Алевтина Леонтьевна. Кини кэргэнинээн Егоров Иван Ивановичтыын улуус биллэр спортсменнара, физкультура учууталлара. Хаптаҕайдааҕы спорткомплекс Егоров Иван Иванович аатын сүгэр.

Бу тэрээһин кэмигэр Алевтина Леонтьевна коллегалара кэлэн кинини «Биһиги Алевтина Колчинабыт этэ...”, “Эдэркээн, бааһынай кыраһыабай кыыс хайыһарынан көтөн эрэр тэҥэ сүүрэн кылбаҥнатарын көрөөрү эрэ, сорох сорохтор күрэхтэһиилэргэ кытта кэлэрбит”- диэн күлэ-үөрэ ахталларын хаста да иһиттим...

Саха сиригэр физкультурнай хамсааһын саҕаламмыта 100 сылын бу курдук үрдүк таһымнаахтык, өрө көтөҕүллүүлээхтик, уопсастыба бары араҥата сомоҕолоһон туран бэлиэтээбиппит инники кэскилбит сырдыгар, дьоллооҕор эрэли үөскэтэр.

***

Мэҥэ Хаҥалас УНО-тын специалистарын, В.М.Пестряков хаартыскаҕа түһэриилэрэ киирдилэр.

2023-12-02 04:58:05

Всего просмотров: 224