Сахалыы сыhыарыы
Ама, да буолбутун иһин!
Туйаара НУТЧИНА
 Оптуорунньук күн, бэс ыйын 7-гэр, Дьокуускайдааҕы суут урукку ыччат миниистиринэн үлэлээн кэлбит Алексей Еремеевка 6,5 сылы биэрдэ. Еремеев ХК 4 ч. 160 ыст. (атын киһи баайын уоруу); 2 ч., 286 ыст. (дуоһунас боломуочуйатын үрдэтии) буруйданна. Өлүү болдьохтоох, кини, 16.02.03 сыллааҕы В.А.Штыров ыйааҕынан «Эдэр ыаллары дьиэнэн хааччыйыыга» федеральнай уонна өрөспүүбүлүкэ хааһынатыттан тыырыллыбыт үбү тыырар боломуочуйаламмыта.
Маннык, судургутук санаан ыллахха, тоҕо саха миниистирдэрэ, тойотторо-хотуттара эрэ «тутуллалларый», хоруупсуйаҕа буруйданалларый?
Төһөлөөх атын омук дьоно уоралларын истэбит даҕаны харыларыттан харбаппаттар. Хата, сиэн-аһаан баран үөс сиргэ үрдээн бараллар. Куорат урукку мээрэ Илья Михальчук мантан Москубаҕа барарыгар аҥаардас чымыдааныгар икки мөлүйүөнү лөкөччү укта сылдьыбыта биллэр. Михальчук уоран-талаан баран Архангельскай уобалас губернатора дуоһунастаммыта. Кини оннугар, кэм да, биһиги дьоммут – Елизавета Николаева уонна Сергей Петров буруйу боруостуу барбыттара. Оттон атааннаах-мөҥүөннээх ЕРКЦ хотуна Юлия Пругова сэмэй дьарыллыыны ылан баран, тыаһа-ууһа суох симиктик көһөн күккүрээн «материкка» барбыта.
В.А.Штыров саҕана тутууну дьаһайбыт Василий Грабцевич, биир саха гимназиятын чэпчэки матырыйаалынан туттарарыгар, откат быһыытынан хас да оскуола сууматын ылбыт диэн сир-буор аннынан сипсийэллэр. Тутуллуохтааҕар, уорбаланыахтааҕар, хата, киһибит чыына-хаана үрдээн «АЛРОСА» хампаанньа вице-президенэ буолан лөглөс гына түспүтэ. «Якутия – большая строительная площадка» диир тутуу муҥутуур саҕаланар кэмнэригэр Грабцевич дьэ, туттумахтаһан хаалбыт буолуохтаах. Ол түмүгэр, билигин (сэрэйдэххэ улахан откаты биэрбит) омук дьоно тутууну баһылаан-көһүлээн олордохторо.
Сергей Петров – куорат тутуутун дьаһайбыта. «Дьаһайбыта» диэн улахан этии. Дьаһайа, кыттыһа сатаабытын, өрөспүүбүлүкэ «улахан тутааччыта» Грабцевич чугаһаппатаҕа сэрэйиллэр. Онон, өссө Сергей Стальевич хаайыыга түбэһиннэрбиттэригэр ким кыттыгастааҕа биллибэт. Петрову «где этот якутенок» диэн кыйаханан, дэлэҕэ даҕаны Грабцевич хаһыытыа дуо?
Тыа хаһаайыстыбатын миниистиринэн олорбут Роман Дмитриев 800 тыһ. солк. «арастарааталаан» үлэтиттэн уурайбыта, Капитоновкатааҕы инбэлииттэр дьиэлэрин хотуна Айталина Дьяконова 200 тыһ. «сиэбит» аатырар, эмиэ тыа хаһаайыстыбатын миниистиринэн үлэлээбит Степан Охлопков 20 мөл. «уорбут», Алексей Еремеев эмиэ 20 мөл. «итээбит»…
Миллиардынан уорбут дьон үрдээн-үүнэн иһэллэр. Биһиги дьоммут, оннук айылаах эрдэттэн былааннан уоруохха-сиэххэ диэн үлэлииллэрэ буолуо дуо, ама? Оннук сыаллаах-соруктаах киһи, оттон хайыҥ охсунан суолун-ииһин – докумуонун, биир да бэрэбиэркэ таныыта кычыгыламматын курдук кыркаҕа суох кичэйэн бэлэмниэхтээҕэ, толоруохтааҕа эбитэ буолуо эбээт.
«Биһиги дьоммут билии-көрүү, докумуон толоруутугар буоллун-хааллын диэн ээл-дээл сыһыаннаһа үөрэммиттэриттэн бүдүрүйэллэр» диэн өр кэмҥэ ревизионнай хамыыһыйаҕа үлэлээбит киһи этэр. Аны, улгуммут, майгыбыт-сигилибит нуулдьаҕайа бөҕөтө! Ким улаханнык түөһүн тиҥиргэппитигэр, тыла минньигэһигэр итэҕэйэн иһэбит. Бэйэбит суокка-учуокка, суукка-сокуоҥҥа билиибит мөлтөһүөр. Ким баҕарар кэлэн сүүлүктээн барбытын кэннэ, хаалбыт хааһыга хара-бөтө сырыттахпыт. Дьэ, иэдээн.
Алексей Еремеев чаҕылхай ыччаттартан биирдэстэрэ этэ. Элбэх оҕолоох кыаммат ыал оҕото. Халыҥ аймаҕа, билсиитэ-көрсүүтэ суох, чэҥкир бэйэтин өйүнэн суолун хайынан тахсыбыт эдэр киһи. Ким эрэ уктэтэн, угаайыга киллэрэн биэрбитин содулугар 6,5 сылга хаайыыга хараллар дьылҕаламмытыттан киһи хараастар. Олус…
(Кыым.ру - 09.06.11)
2011-06-09 10:43:10 Всего просмотров: 3321 Поделиться: 
Ссылки по ключевым словам:
2025-08-31 08:29:12 - Дьиҥнээх эр бэрдэ, амарах аҕа уонна сиэрдээх киһи оҕотуттан аккаастаммат. Василий Аммосов үтүө аатыгар 2025-06-17 00:12:45 - Ил Түмэн хатыыһы, муксууну сокуоннайа суох балыктааһын иһин ыстараабы намтатарга этии киллэрдэ 2023-08-15 06:52:05 - Александр Жирков: Итэҕэлгит иһин махтанабын 2021-12-13 08:11:45 - КЭРИЭСТЭБИЛ. Дьон өйдүүрүн тухары – киһи тыыннаах 2020-05-27 08:18:46 - Иван КУЛЬБЕРТИНОВ аҕатыгар анаммыт памятник эскиһин сөбүлээбэтэх
2018-03-09 08:54:47 - Саха киһитин санаатын сааһылыыр кэмэ кэллэ 2016-07-20 15:23:41 - Киһи олоҕун 1 тыһыынчаҕа сыаналыыр тойоттор
2013-07-01 12:52:49 - Аанньаахха биир мандаттаах уокурукка икки киһи Ил Түмэн быыбарыгар кыттар баҕатын биллэрдэ
2013-07-01 12:49:49 - Ньурбаҕа биир мандаттаах Ил Түмэн быыбарыгар түөрт киһи регистрацияланна
2013-01-30 13:39:15 - Ыт - аһаабыт иһитигэр кулгуйар. КАЗАРЯН куһа5ан биккэ кубулуйда
|
