Общественно-политическая интернет-газета

Былырыын баччаҕа - Россия Конституциятын күнүгэр, Сахалыы тыллаах бастакы "Манчаары" хаһыата күн сирин көрбүт күнүгэр, норуот тулуурун-дьулуурун, көҥүлгэ талаһыытын сөҕөн "Манчаары" диэн ааттаабыт норуот депутатын - Афанасий МАКСИМОВЫ 7 сылга хаайыыга уураахтаабыттара.

Бүгүн, 2012 сыл ахсынньы 12 күнүгэр 12.00 чаастан Бэчээт дьиэтин пресс-киинигэр "Афанасий МАКСИМОВ хаайыыга киирбитин кэннэ 1 сыл буолан баран..." диэн ааттаах төгүрүк остуол тэрилиннэ. Тэрээһини "Ситим" общественнай тэрилтэ көҕүлээн ыытта.

Бастатан туран, дьыала-куолу хаамыытын депутат общественнай көмөлөһөөччүтэ уонна көмүскэһээччитэ Николай СЕДАЛИЩЕВ иһитиннэрдэ.

- 1993 сыллаахха Россия норуота референдумнаан дойду Конституциятын ылыммыппыт. Бу төрүт сокуоҥҥа олоҕуран киһи, гражданин бырааба, көҥүлэ сокуонунан араҥаччыланыахтааҕа. Ол гынан баран, сокуон олоххо тутуһуллубатын чаҕылхай туоһутунан, бу былырыын норуот депутата Афанасий МАКСИМОВ уонна кини биир идэлээхтэрэ олоҕо суох буруйдааһынтан сиэттэрэн билигин хаайыыга хараллан сыталлар. Буолаары буолан, анаан оҥорбут курдук, былырыын ахсынньы 12 күнүгэр бириигэбэрдэрэ ааҕыллыбыта. Ол гынан баран суут систиэмэтэ букатыннаахтык буомурбатах эбит, дьиҥнээх демократия тыына син биир баар эбит. Сэтинньи 23 күнүгэр Москваҕа, РФ Үрдүкү суута МАКСИМОВТААХ дьыалаларын үөрэтэн көрөн баран сокуону кэһэн тэриллибит, ньүдьү-балай балыыр баарын булан ылла уонна дьыаланы СР Үрдүкү суутугар төттөрү ыытта. Бириигэбэр букатыннаахтык көтүрүллүөхтээх, сууттаммыт түөрт киһи ааттара суут-сокуон хараҕынан ыраастаныахтаах диэн биһиги бүк эрэнэбит, - диэн Николай Иннокентьевич эттэ.

СЕДАЛИЩЕВ докумуоннары хасыһан-хасыһан, били "уоруллубут" диэн ааттаммыт 50 мөлүйүөннээх "Якутгазпром" векселэ төттөрү "Якутгазпромҥа" туттарыллыбыт кассовой-приходной ордерын булан ылбыт. Бу докумуону дьыаланы ыыппыт силиэдэбэтэл КАРЕЛИН ылан баран кистээн, силиэстийэ дьыалатыгар киллэрбэтэҕин туһунан эттэ. Аны, МАКСИМОВТААХ дьыалаларын көрбүт суут састааба , чуолаан, судьуйа ПОПОВ сокуону кэһэн туран иккистээн сууттаабытын эттэ. ПОПОВ дьыала тэриллэригэр эмиэ баар эбит, тиһэх бириигэбэри ыларга эмиэ кини кыттыспыт. Ону бырачыастаан прокурор солбуйааччыта ЩЕРБАКОВ кассационнай ааһыныы түһэрэ сылдьыбыт эбит. Ону сууттар билиммэккэ кэнсэлээрийэлэрин түгэҕэр "ууран" баран "умнан" кэбиспиттэрин СЕДАЛИЩЕВ архыыптан булан ылбыт. Дьэ, ситинник систиэмэлээх суукка кырдьыккын хайдах таһаарыныахха сөбүй?! Киһитэ кини буолан, ымпыктаһан-чымпыктаһан хостоон-ороон таһаардаҕа.

ЩЕРБАКОВУҤ маладьыас эбит, холобур, тойонун ПОДЛАСЕНКОНЫ утары баран кассационнай ааһыныы суруйан ПОПОВ судьуйа дьыаланы көрөрүн бырачыастаатаҕа.

***

"ЯТЭК" сорунуулаахтык охсуһан депутаты хаайтарбыта. Билигин истибиппит, ФАС Николай СЕДАЛИЩЕВ суругар хардаран манныгы суруйбут: "ЯТЭК" АО хаһаайына билигин "Инвестор" диэн ХЭТ, тэрийээччитэ биир киһи". Ол аата Зиявуддин МАГОМЕДОВ "ЯТЭК" хампаанньатын ханнык эрэ биир киһиэхэ атыылаабыт буолан тахсар. Ол киһи кимэ биллибэт.

- ФАС бу Саха сирин гааһа стратегическэй суолталаах диэн билинэр, ол гынан баран стратегическай суолталаах сир баайын тоҕо биир киһи бас билэр бырааптааҕын кыайан быһаарбат, - диэн Николай Иннокентьевич этэр.

Санатар эбит буоллахха, "Якутгазпром" (билигин "ЯТЭК") хампаанньаны 2007 сыллаахха "Славия" диэн тэрилтэ атыыласпыта. Бу "Славия" учредителэ Вирджиния арыытыгар олорор омук гражданина диэн этэ.

- Төрүт Сокуон 9-с ыстатыйатыгар этэр "сир баайа - олохтоох норуот баайа" диэн. Ол гынан баран дьиҥ олоххо кэллэххэ, Саха сирин 500 млрд кубометрдаах гааһа биһиэхэ буолбатах, ханнык эрэ биир киһи бас билиитигэр баар. Норуот баайын биир киһи илиитигэр биэрээри Максимовы хаайыыга олордубуттара, - диэн СЕДАЛИЩЕВ этэрэ, бу балыырдаах дьыала төрдүгэр-төбөтүгэр сытара өтө көстө сылдьар.

***

МАКСИМОВ дьыалата Москваттан сэтинньи 26 күнүгэр ыытыллыбыт, Дьокуускайга кэлэ илик диэн адвокаттар эттилэр. Дьыаланы дьиҥинэ Москваттан кэлэрин кэтэспэккэ, билигин да көрүөхтэрин сөп этэ, ол гынан баран тустаах дьон итиннэ интэриэстэрэ суох. Аны быыбардар кэллилэр. Утарылаһааччылар норуот депутата быыбар иннинэ тахсарыгар эмиэ улахан баҕалара суох курдук.

Иһитиннэрии быһыытынан эттэххэ, МАКСИМОВ уокуругуттан Ил Түмэҥҥэ Иван МАКАРОВЫ ("Сахатранснефтегаз") туруоруох курдуктар дииллэр. МАКАРОВ бу иннинэ билигин эмиэ кэтэх бас билиигэ барбыт "Туймаада-нефть" генеральнай дириэктэринэн үлэлээбитэ. Куорат баһылыга Айсен НИКОЛАЕВ куорат мээрин быыбарыгар кыттарын саҕана "Кыымҥа" интервью биэрэн турар. Онно "МАКСИМОВ дьыалатын" туһунан туох санаалааҕын ыйыппыппар: "Бэйэбит дьоммут саҕалаабыттара, уонна кинилэр билигин тугу да билбэтэҕэ-көрбөтөҕө буола сылдьаллар", - диэн эппиттээҕэ. Штыров саҕана президент уонна правительство дьаһалтатын салайан олорбут киһи - Айсен НИКОЛАЕВ ити тыллары мээнэҕэ эппэтэҕэ сэрэйиллэр.

***

"ЯТЭК" сыл саҕаланыытыгар тарыыбын сыанатын 63 бырыһыан үлүннэрбитэ. "Билигин "Якутскэнерголары" кытары кыттыһан мыраан кэтэҕэр ГРЭС-2 тутуохтара уонна эһиги хайдах да буолуҥ, атыылаһар буоллаххытына атыылаһыҥ, суох да суох" диэн туруохтара. Бас быстар сыанаҕа гааһы-уоту атыыласпакка ханна барыахпытый?" - диэн куорат Думатын депутата Константин ФЕДОРОВ этэр. ФЕДОРОВ прокурордары, судьуйалары норуот талара эбитэ буоллар, дьэ дьиҥнээхтик сокуон тутуһуллуох этэ диир. Кырдьыга оннук. "Билигин прокуратура кимиэхэ да бас билиммэт, ким да иннигэр эппиэт туппат туспа сокуоннаах, ураты бэрээдэктээх уоргаҥҥа кубулуйбутун" депутат ыйар.

***

Игорь ПАХОМОВ аҕата Иннокентий ПАХОМОВ Николай СЕДАЛИЩЕВКА кырдьыгы туруулаһа сылдьарыгар сүгүрүйэрин уонна махтанарын эттэ. Бу хара балыыртан сылтаан инбэлиит буоллум диэн кырдьаҕас аҕа этээхтиир. "В.ШТЫРОВЫ убаастыыр ахан киһи этим. Онтон биир мунньахха "эн уолуҥ массыанньык!" диэн эппитигэр олус кэлэйбитим. Улахан дуоһунастаах киһи, сокуон мэктиэһитэ буолуохтаах этэ, ол оннугар дьону үрдүттэн ылан "массыанньык" диэн ааттыы-ыыстыы сылдьара сүрдээх дьыала... Дьэ, ити кэнниттэн кини биэрбит дьаралыгын тумус туттан силиэдэбэтэллэр үлэлээн күксүгүнүйэн барбыттара. Кырдьыгы таһаараары буолбатах, Штыров ыыстаабатын дакаастыы сатаары... Дьиҥинэн, республика баайа-дуола биирдиилээн дьон киирбитигэр хата бэйэтин сууттуохха баара", - диэтэ.

***

Мустубут дьон, общественность, депутаттар, аймахтар, доҕоттор суут дьыаланы кырдьыктаахтык көрөн бириигэбэри көтүрэригэр уонна норуот депутатын Афанасий МАКСИМОВЫ, норуот хаһаайыстыбатын үтүөлээх үлэһитин Игорь ЧИКАЧЕВЫ, эдэр специалистары Игорь ПАХОМОВЫ уонна Владимир РОЖИНЫ үтүө ааттарын ыраастыырыгар туруорустулар.

***

Төгүрүк остуолу видеосюжетын бу аадырыһынан киирэн көрүөххүтүн сөп. http://play.ykt.ru/video/67514

Сюжеты "Якутия 21 век" интернет-телевидение редактора Лариса АНИСИМОВА - БААЙ уонна Николай КОРОВИН бэлэмнээтилэр.

***

Аартык.ру - 12 декабря 2012 года:

http://aartyk.ru/sakha/item/2154-ahsynny-12-k%D2%AFne-t%D3%A9r%D2%AFt-sokuonun-k%D2%AFne-noruot-deputatyn-biriigebere-tahsybyta-1-syl-buolla

2012-12-13 19:27:02

Всего просмотров: 2076